நாள்: 24-04-2023
” என்னிடத்தில் உங்களுக்குச் சமாதானம் உண்டாயிருக்கும் பொருட்டு இவைகளை உங்களுக்குச் சொன்னேன். உலகத்தில் உங்களுக்கு உபத்திரவம் உண்டு . ஆனாலும் திடன் கொள்ளுங்கள், நான் உலகத்தை ஜெயித்தேன் என்றார். “யோவான் 16 : 33
நம்முடைய கஷ்டங்களில் இந்த வசனங்களை நாம் நினைவில் கொள்ள வேண்டும். இந்த வசனத்தை இயேசு சீடர்களிடம் கூறும் போது அதன் பின்னணியை பார்ப்போம். சீடர்கள் மூன்று ஆண்டுகள் முழுவதும் இயேசுவோடு இருந்தார்கள், அவர்கள் ஏராளமாக ஆசீர்வதிக்கப்பட்டார்கள். அவர்களுக்குரிய எல்லாவற்றையும் இயேசு கவனித்துக் கொண்டதால் அவர்களுக்கு வாழ்க்கையில் எந்தக் கவலையும் இல்லை. சீடர்களுக்கு பெரிய கனவுகள் மற்றும் நம்பிக்கைகள் இருந்தன, ஆனால் இந்த வார்த்தைகள் சீடர்கள் கண்ட கனவுகள் அனைத்தையும் சிதைத்துவிட்டன. இயேசுவின் சிலுவை மரணத்திற்குப் பிறகு சீடர்கள் சந்திக்கப் போகும் அனைத்துப் போராட்டங்களையும் பற்றி இயேசு விளக்குவதிலிருந்து இந்த அதிகாரம் தொடங்குகிறது.
யோவான் 16 : 2
“அவர்கள் உங்களை ஜெப ஆலயங்களுக்குப் புறம்பாக்குவார்கள், மேலும் உங்களைக் கொலை செய்கிறவன்தான் தொண்டு செய்கிறவனென்று நினைக்குங் காலம் வரும். “
நம் வாழ்க்கையில் நாம் ஆசீர்வாதங்களை மட்டுமே எதிர்பார்க்கிறோமா? அல்லது உலகின் போராட்டங்களை ஏற்றுக்கொள்கிறோமா?
நாம் இப்போது , உலகில் போராட்டங்கள் எதற்காக என்று பார்ப்போம். ஆதாமும் ஏவாளும் பாவம் செய்தபோது, அது அவர்களைக் கர்த்தரிடமிருந்து பிரித்து சாத்தானுக்கு அவர்கள் மீது அதிகாரத்தைக் கொடுத்தது. ஆம்! பாவம் நம்மை கடவுளிடமிருந்து பிரித்து சாத்தான் நம் வாழ்வில் நுழைய வழி செய்கிறது. சாத்தானுக்கு இயற்கையின் மீது அல்லது இந்த உலகில் உள்ள எதன்மீதும் அதைக் கட்டுப்படுத்தும் அதிகாரம் கிடையாது. ஆனால் மக்கள் பாவத்தில் விழும்போது அவனால் மக்களை கட்டுப்படுத்த முடியும்.
கர்த்தரின் பிள்ளைகள் யார், பிசாசின் பிள்ளைகள் யார் என்பதை நாம் இதன்மூலம் அறிந்து கொள்ள முடியும். சரியானதைச் செய்யாத எவரும் கர்த்தரின் குழந்தை அல்ல.
1 யோவான் 3 : 10
” இதினாலே தேவனுடைய பிள்ளைகள் இன்னாரென்றும் , பிசாசின் பிள்ளைகள் இன்னாரென்றும் வெளிப்படும். நீதியைச் செய்யாமலும் தன் சகோதரனில் அன்பு கூறாமலும் இருக்கிற எவனும் தேவனால் உண்டாவனல்ல.
வேதத்தின்படி உலகில் இரண்டு வகை மனிதர்கள் மட்டுமே உள்ளனர், சாத்தான் சுயநலவாதிகளை உருவாக்குகிறான். அவர்கள் தங்கள் சுயநலத்தால் உலகை அழிக்கிறார்கள். சில வருடங்களுக்கு முன்பு வரை நாம் நிறைய நோய்களைப் பற்றியோ அல்லது ஹோட்டல்களில் சாப்பிட்டுவிட்டு மக்கள் இறந்து போவதையோ பற்றி நாம் கேள்விப்பட்டதே இல்லை. ஆனால் இப்போது நாம் இவற்றையெல்லாம் பார்க்கிறோம், ஏனென்றால் சாத்தான் தங்கள் வியாபாரத்தில் லாபம் சம்பாதிக்க சுயநலமான காரியங்களைச் செய்பவர்களைக் கட்டுப்படுத்துகிறான். ஒழுக்கக்கேடான உறவும், அன்பு இல்லாதவர்களும் இந்த உலகில் எல்லாக் குற்றங்களையும் செய்வதைப் பார்க்கிறோம். இந்த உலகில் போராட்டங்கள், உடல்நலப் பிரச்சினைகள், மரணங்கள், கொலைகள், ஏமாற்றுதல்கள், குடும்பங்களில் முறிவுகள் அல்லது சண்டைகள் உள்ளன, ஆனால் அது கர்த்தரிடமிருந்து அல்ல, மாறாக மக்கள் இதைச் செய்யும்படியாக சாத்தான் மக்களைக் கட்டுப்படுத்துகிறான்.
ஆனால் உலகத்தை ஜெயித்த நம் கர்த்தர் நம்முடன் இருப்பதால் இத்தனை போராட்டங்களுக்கு மத்தியிலும் நாம் வெற்றி பெற முடியும்.
ஆனால் நாம் எப்படி வெற்றி பெறுவது? “உன் சிலுவையைச் சுமந்துகொள்” என்று இயேசு சொன்னார்.
தென்னிந்தியாவில் நன்கு அறியப்பட்ட ஒரு பிரபலமான போதகர் ஒருமுறை தனது வாழ்க்கையின் சாட்சியத்தைப் பகிர்ந்து கொண்டார். அவர் தமது 5 ம் வயதில் ஊனமுற்றார். பள்ளி மற்றும் கல்லூரி நாட்களில் சக மாணவர்கள் விளையாடுவதையும் வாழ்க்கையை ரசிப்பதையும் பார்த்து மிகவும் வருத்தமாக இருந்தாராம். ஆனால், கல்லூரி நாட்கள் முடிந்து இயேசுவிடம் வந்தபோது, இது தனக்குச் சுமக்கக் கொடுக்கப்பட்ட சிலுவை என்பதை புரிந்துகொண்டார். கர்த்தர் என்னை முழுமையாக குணப்படுத்த வல்லவர். ஆனால் கர்த்தர் என்னை குணப்படுத்துவார் என்று நான் எதிர்பார்க்கவில்லை, ஏனென்றால் இந்த வாழ்க்கையில் நான் சுமக்க வேண்டிய சிலுவை இது. இப்போது லட்சக்கணக்கான மக்களைக் காப்பாற்றுவதன் மூலம் கர்த்தர் அவரது வாழ்க்கையை ஆசீர்வதித்துள்ளார் மற்றும் அவர்களை இரட்சிப்புக்கு அழைத்துச் சென்றுள்ளார். மற்றவர்களை ஆசீர்வதிக்கும்படியாக கர்த்தர் அவரை வைத்திருக்கிறார்.
ஒரு பையன் தனது தோளில் ஒரு கனமான சிலுவையைச் சுமந்துகொண்டு நடப்பதைப் பற்றிய உவமை உள்ளது. சாத்தான் ஒருவன் அவனிடம் வந்து, ஏன் இப்படிச் சுமக்கிறாய், அதை எனக்குக் கொடு, நான் அதை உனக்காகக் குறைத்துத் தருகிறேன் என்றான். அவன் தனது சிலுவையை அவரிடம் கொடுத்தான். சாத்தான் சிலுவையின் நீளத்தைக் குறைத்து, அதை அவனிடம் கொடுத்தான், இப்போது அந்தச் சிலுவையின் நீளம் குறைவாக இருப்பதால், அந்த பையன் அதைச் சுமப்பதில் மிகவும் மகிழ்ச்சியடைந்தான். அவன் தனது வாழ்க்கைப் பயணத்தைத் தொடங்கினான். அவன் சொர்க்கத்திற்கு அருகில் வந்தபோது, சொர்க்கத்தை அடைய ஒரு பெரிய நதியைக் கண்டான். மக்கள் அதை எப்படி கடக்கிறார்கள் என்று பார்த்தான் . ஆற்றை கடக்க தன்னிடமிருந்த சிலுவையை பாலமாக போட்டுள்ளான். நீளம் குறைவாக இருந்ததால் அவன் சிலுவையை போட்டபோது ஆற்றில் சிலுவை விழுந்து சொர்க்கத்திற்கு செல்லும் வழியை இழந்தான். நாம் எளிதாக நினைக்கக்கூடிய , குறுக்குவழிகள் மற்றும் இலகுவான வழிகள் எதுவும் இல்லை. ஆனால் அவை நம் பாதைகளை முற்றிலும் வலுவிழக்கச் செய்கின்றன.
இவ்வுலகில் போராட்டங்கள் உள்ளன. ஆனால் நமக்குக் கொடுக்கப்பட்ட சிலுவையைச் சுமந்துகொண்டு, இயேசுவைப் பற்றிக் கொண்டு இந்த உலகை வெல்வோம். ஆமென்
Sol .லியோ